Ju bëjmë thirrje subjekteve politike dhe kandidateve për zgjedhjet lokale të tregojnë përgjegjshmëri me simbolikat që përdorin gjatë fushatës elektorale të cilat dëmtojnë rëndë moralin e fëmijëve dhe nxisin krijimin e modeleve negative tek të rinjtë.

Ligji nr 17/ 2018 ” Për të drejtat dhe mbrojtjen e fëmijëve ” në nenin 5, pika 9 përcakton si parim të rëndësishëm “Respektimin e dinjitetit, nderit dhe personalitet të fëmijes” në Republikën e Shqipërisë.

Posterat elektorale me përmbajtje dhe imazhe jodinjitoze ndikojnë në keqinformimin e fëmijëve. Politikanet duhet të jenë shembulli më i mirë per t’u ndjekur nga brezi i ri. Fëmijët dhe të rinjtë nuk kanë nevojë të ndërgjegjesohen nëpërmjet formave banale. Kjo e fundit tregon vetëm shterpësi mendimi dhe kulture.

Shpërndarja në ambiente publike, por dhe në rrjetet sociale te imazheve të tilla të papërshtatshme për t’u parë nga fëmijët, njekohësisht me gjuhë urrejtje dhe bullizuese përbën gjithashtu shkelje të nenit 11 dhe të nenit 23 të ligjit të sipërcituar dhe të parimeve të mbrojtjes së fëmijëve. Neni nr 11 citon “Përmbajtje të dëmshme për fëmijën” janë çdo pamje, imazh dhe çdo material tjetër që qarkullon në internet dhe që cënon dinjitetin dhe të drejtat e fëmijës. Gjithashtu neni 23 përcakton që fëmijet kanë të drejtë të mbrohen ndaj të gjitha formave të dhunës, pavarësisht vendit ku kryhet.

Imazhet e shpërndara në rrjete sociale dhe në reklama në kryeqytet, përveçse të papërshtatshme, kanë dhe përmbajtje bullizuese dhe përcaktimet ligjore shprehin qartë detyrimin per t’i mbrojtur fëmijet nga çdo forme dhune apo bullizmi në çdo ambient.