PROGRAMI PËR PARANDALIMIN E KRIMIT TË FSHEHUR NË KOMUNITET/ FOCUS GROUP NË NJËSINË 9 TË BASHKISË TIRANË
Në kuadër të programit të parandalimit të krimit të fshehur në komunitet mundësuar nga SCPA Programme zhvilluam më datë 15 korrik 2020 një focus group në Njësinë Administrative 9 të Bashkisë Tiranë me pjesëmarrjen e Administratores së Njësisë 9; përfaqësuesve të Shërbimit Publik dhe Social; Ndërlidhës të Komunitetit dhe Drejtorisë së Qendrës Sociale Multifunksionale.
Në fillimin e takimit u theksua nga Leart Kola-Drejtor Ekzekutiv ISSH rëndësia e projektit SCPA mbi policimin në komunitet dhe parandalimin e krimit të fshehur. Tirana si një qytet i madh reflektohen shumë tensione dhe problematika në shoqëri të cilat kërkojnë zgjidhje nga institucionet, aktualisht problematikat zgjidhen dhe orientohen nga ndërlidhësit e komunitetit si një mekanizëm i krijuar rreth tre vite më parë.
Ndërlidhësit e komunitetit janë inspektor të shpërndarë në zona të caktuara sipas sipërfaqes dhe dendësisë së popullësisë të cilët përcjellin problematikat sociale në Njësinë Administrative, ndërmjetësojnë zgjidhje për problematikat mes banorëve dhe bashkëpunojnë me policinë dhe raportojnë problematikat në rrugë institucionale etj.
Ndërlidhësit e komunitetit nuk funksionojnë mbi një kuadër ligjor, por mbi një draft të pamiratuar. Nevojitet një koordinim më i mirë me policinë e shtetit dhe me njësinë administrative duke organizuar takime të rregullta mujore, për të përmirësuar mënyrën e raportimit.
Një prej opsioneve të zgjidhjes dalë gjatë bisedës është që policimi në komunitet të funksionojë si strukturë zyrtare me dy-tre të punësuar pranë çdo Njësie Administrative dhe të kenë kompetenca dhe detyra të qarta të proceseve të punës. Gjithashtu të shëndërrohet më tepër si një forcë policore, të kenë mekanizma ndërhyrës dhe raportues, si dhe të jetë e pranishme në zonë.
Ky takim ishte i rëndësishëm për të përmirësuar mekanizmin ekzistues të policimit në komunitet dhe për të pasur rezultate dhe shërbime më të mira.