WORKSHOP – Distancat e Shërbimeve në Bashkinë e Tiranës
Më datë 30 mars 2021, prej orës 17:00 deri më orën 18:00 në hapësirat e Tulla Centre Culture u zhvillua workshop-i parë në kuadër të projektit “Distancat e Shërbimeve Publike në Bashkinë e Tiranës”. Në këtë aktivitet ishin të pranishëm 22 pjesëmarrës nga 44 aplikantët e thirrjes për vullnetarë, të cilët gjatë zhvillimit të aktivitetit respektuan protokollet e pandemisë.
Aktiviteti u çel nga një fjalë mirëseardhje e Leart Kola, Drejtor Ekzekutiv i Institutit të Studimeve Sociale dhe Humane, ku prezantoi qëllimet dhe objektivat e këtij projekti që do të shtrihet përgjatë këtij viti.
Më pas përmes lidhjes në zoom eksperti Sokol Tushe, i specializuar në Sistemet e Informacionit dhe Menaxhimit, Universiteti Emory, Shtetet e Bashkuara të Amerikës prezantoi gjetjet paraprakte të projektit. Aktualisht shërbimet publike diskutohen në dendësinë e numrit të banorëve, pra numër i caktuar shkollash për 1000 banorë. Nga vëzhgime e deritanishme ekziston një pabarazi gjeografike në mënyrën se si institucionet janë të shpërndara ku lagjet e vjetra në qendër janë më pranë shërbimeve ndërsa në zonat urbane ka pasur një përqëndrim të vendimmarrjes të krijuar pas reformës territoriale.
Qëllimi teknik i projektit është një analizë e detajuar e shërbimeve publike në Tiranë, përmes matjes së distancave për kohë ecje në makinë ose në këmbë. Në fokus do të jenë shërbimet për çerdhet, kopshtet, shkollat, qendrat shëndetësore, komisariatet e policisë dhe qendrat e postës, nga ku analiza për kopshtet është e përfunduar.
Ndërkohë pas prezantimit të formimit të pjesëmarrësve dhe pritshmërive të tyre, ata u ndanë në tre grupe respektivisht: analizimi i të dhënave, mobilizimi dhe lobimi në terren, si dhe dukshmëria.
Ky projekt po zbatohet me mbështetjen dhe financimin e Lëviz Albania, projekt i Agjencisë Zviceriane për Zhvillim dhe Bashkëpunim SDC nga konsorciumi i tre organizatave Shoqëria e Hapur për Shqipërinë, Partners Albania dhe Co-Plan Albania